هېڅ نه پاتې کېږي آیینه د سکندر او جام د جم نه پاتې کېږي دا زمونږ ښاغلي څه چې کل عالم نه پاتې کېږي د اجل خزان ته پاتې، ستا پرواز له دې چمنه پلوشې د نمر چې راشي نو شبنم نه پاتې کېږي د سکون له وهمه ذهن، لږ صفا کړه چې خبر شې […]
هېڅ نه پاتې کېږي
آیینه د سکندر او جام د جم نه پاتې کېږي
دا زمونږ ښاغلي څه چې کل عالم نه پاتې کېږي
د اجل خزان ته پاتې، ستا پرواز له دې چمنه
پلوشې د نمر چې راشي نو شبنم نه پاتې کېږي
د سکون له وهمه ذهن، لږ صفا کړه چې خبر شې
دې سفر کې به یوځای هم، هیڅ آدم نه پاتې کېږي
سمېدی نه شي هیچرې د هستۍ د لیلی زلفې
درته چا وې چې شانه بیا یې خم نه پاتې کېږي
بس یوازې نېک عمل دی چې بقا یې مسلم ده
بې د دې نه حقیقت دی، زیات و کم نه پاتې کېږي
دی هجوم د ارمانونو پکې ورک د فنا غم دی
چې له دې هجومه اوځي، بیا څه غم نه پاتې کېږي
په ژوند اومره رحمن وايي چې د مرګ له غمه خلاص شې
بیا چې مړ شې هغه غم دې په هیڅ دم نه پاتې کېږي
امیر حمزه خان شینواری